von Theresia Schneizlinger

Er schaugt ja wirklich liab aus, da Sebastian Frankenberger, der Initiator vo dem Voiksentscheid weng am generellen Rauchvabot in de Wirtshäuser - und überhaupts: treuherziger Dackelblick, Dauerlächeln, Softie irgendwie. Von wegen!

Fortsetzung:

Normalerweis laffa oide Leit mit überdimensionierte und abbruchsichere Betonköpf umandand. Ja mei - de sann hoid oid und do konn ma ned vui Toleranz erwarten. Ma moanat, de junga Leit hättn dazuaglernt. Da Frankenberger mit seine 28 Jahr jedenfois ned. Guad: A Mo mit 28 is natürlich ned ois reif zu bezeichnen, weil bis se bei junge Männer da Testosteronstau auf a sozialvertägliches Maß eipendelt, des braucht sei Zeit. Und wenn ma sunst koa Richtschnur hod im Lebn, wenn ma beutelt is vo de Anforderungen im richtigen Lebn und bloß oans hod: a Vision - dann geht ma in d Politik. Und der Bua hod einfach a Glück ghabt, daß die ÖDP gibt. Wer sunst häd eahm gnumma? Gnumma scho, jeder Beitragszahler is bei de Parteien mittlerweile gfrogt. Aber daß aa wos zum Sagn hod!

I woaß ned so recht, wos i vo am Politiker zu hoitn hob, der mit 19 Jahr sei erste "Milchschnitte" gessn hod und des aa nur einer Freindin zuliebe (SZ, 18.8.2010)? Gleichaltrige warn eahm immer scho zu langweilig; er trinkt koan Alkohol. Vielleicht war aber er de andern zu langweilig? I stell ma grad vor, wia da Frankenberger mit 17 Jahr in übermenschlicher Selbstverleugnung mit a paar Spezln am Biertisch hockt, an seim Sprudel zuzelt und ned wega de Rauchschwadn im Lokal ned durchblickt bei de Gespräche und da Gaudi am Tisch: Er is unter Aliens! Er is da Meister Proper unter de geistigen Umweltverschmutzer! As mensch-gwordene Sagrotan unter Sondermüll! Mei liawa, des muaßt fei erst amoi aushoitn! Und des hinterlaßt Spuren in der Psyche: Wenn da Frankenberger bei Festivitäten entweder unter dem Jubel vo de Bedienungen aus m Festzelt nausgschmissn werd oder dank Sicherheitsdienst gar ned erst neikummt: Der Bua lächelt und lächelt und lächelt...

Wer sei Meinung gega olle Widerständ durchsetzt, konn a Mahatma Ghandi sei, a Rupert Neudeck, a Nelson Mandela oder a Martin Luther King. De und vui andere Beweger ham dem Frankenberger aber ganz wos Wichtiges voraus: Sie habn immer olle Leit im Blickfeld ghabt; de oane Seiten mit neinemma, hod ned ghoaßn, de andre Seiten ausschliaßn und niedermacha. Des muaß der Bua no lerna, daß genau des Demokratie is. Aber mit 28 Jahr - do is nix mehr drin in der Richtung. Na ja, oa Sektierer mehr in da Welt, es hod ja gnua gebn. Davo könna d nordamerikanischen Indianer vereinzelt no berichten, d Mayas, Inkas und Aztheken nimmer.